Tarombo Si Raja Panggabean

Las do rohanami manggohi pangidoan ni Panitia Penerbit Buku Tarombo ni Radja Panggabean laho mangalehon hata manomu di na haruar buku tarombo on.

Sonang roha manomu (manjambut), alana sian buku on nunga torang tarida :

1. Tangkas naung torop so piga, naung gabe do borunami pinompar ni Radja Panggabean mangingani angka luat na marserak di desa na ualu.


2. Naung lam nalnal do hamadjuon nasida, i ma ala naung mulai adong manang na piga2 naung martitel songon i muse naung mamora.

Marpos ni roha do hami, na boi buku on, gabe rahut2 na togu mambobok hasadaon ni roha di pompar ni Radja Panggabean.

Djadi tolu na porlu di portibi naung adong didjalo pinompar ni borunami Radja Panggabean marhitehite pasupasunami, i ma, hagabeon, hasangapon dohot hamoraon. Antong sai martambatamba dope nian di ganup pinompar ni borunami Radja Panggabean hagabeon, hamadjuon, sinadongan dohot sude angka na ringkot i di parngoluon on songon nidok ni umpasa:

Sahat-sahat ni solu

Sahat ma tu Bontean,

Leleng ma hita mangolu

Djala sahat nang panggabean.

Sai anggiat ma siala buku Tarombo naung hinaruarhon ni Radja Panggabean on, lam tiur partuturan ditonga-tonga ni pinompar ni Radja Panggabean.

Punguan ni Radja Pasaribu dohot Boruna

di Medan.

(DJ. PASARIBU)

K e t u a.

Medan, 30 Djuni 1960.